Britaniya Rossiya soyadagi flotining 100 ta tankeriga qarshi sanksiyalar joriy qilyapti

Hukumat press-relizida aytilishicha, tankerlar Rossiya neft eksportining soyadagi flotining asosiy qismini tashkil qiladi va 2024 yil boshidan buyon 24 milliard dollarlik neftni tashigan.

Britaniya allaqachon Rossiya neftini tashuvchi bir necha o‘nlab tankerlarga qarshi sanksiyalar joriy qilgan.

Bosh vazir Kir Starmer juma kuni Norvegiyada Shimoliy birlashgan ekspeditsiya kuchlarida ishtirok etuvchi davlatlar rahbarlarining yig‘ilishida yangi sanksiyalarni e’lon qilmoqchi.

«Milliy xavfsizligimizga Rossiya tomonidan tahdidni e’tibordan chetda qoldirib bo‘lmaydi, shuning uchun biz uning [Putinning] soyadagi flotini buzish, neftdan keladigan daromadlarini qisqartirish va suv osti infratuzilmamizni himoya qilish uchun qo‘limizdan kelganini qilamiz», — deya Kir Starmer so‘zlarini keltiradi hukumat matbuot xizmati.

Britaniya hukumatining eslatishicha, soyadagi flotning tankerlari nafaqat Moskvaga Ukrainadagi urush uchun pul topishga yordam beradi, balki Yevropadagi suv osti kabellariga ham zarar yetkazgan.

Birlashgan ekspeditsiya kuchlarida ishtirok etuvchi davlatlar rahbarlari juma kuni Osloda yig‘ilib, boshqa masalalar qatori suv osti infratuzilmasini muhofaza qilishni muhokama qiladi.

Birlashgan ekspeditsiya kuchlari Buyuk Britaniya, Daniya, Niderlandiya, Shvetsiya, Norvegiya, Finlyandiya, Estoniya, Latviya, Litva va Islandiya tomonidan tuzilgan.