Sud Trampning Harvardga xorijliklarni qabul qilishni taqiqlash qarorini blokladi

AQSh federal sudi prezident Donald Tramp ma’muriyatining Harvard universitetini xalqaro talabalarni qabul qilish imkoniyatidan mahrum qilishini vaqtinchalik blokladi. Bu haqdagi qaror 23 may, juma kuni sobiq prezident Barak Obama tomonidan tayinlangan AQSh okrug sudi sudyasi Ellison Berrouz tomonidan chiqarilgan.

Bu buyruq Oq uyning ish sudda ko‘rib chiqilayotgan vaqtda oliygohning Talabalar va almashinuvchilar dasturi - Student and Exchange Visitor Program (SEVP)ni faoliyat yuritish sertifikatini bekor qilishiga to‘sqinlik qiladi. Tramp ma’muriyati qaror ustidan shikoyat qilishi mumkin.

Bir kun avval AQSh ichki xavfsizlik vaziri Kristi Noem Harvard universitetini «zo‘ravonlik, antisemitizmni rag‘batlantirish va Xitoy Kommunistik partiyasi bilan muvofiq ishlashda» ayblab, sertifikatni bekor qilishni buyurdi.

Harvard universiteti 23 may kuni Massachusets federal sudiga Tramp ma’muriyatining xalqaro talabalarni o‘qitishni taqiqlashiga qarshi da’vo arizasi bilan murojaat qildi.