Gretsiyada politsiya va muhojirlar o‘rtasida to‘qnashuvlar bo‘lib o‘tdi

16 oktabr, yakashanba kuni Oreokastro shahri yaqinidagi lagerda grek politsiyasi va muhojirlar o‘rtasida to‘qnashuv ro‘y berdi. Bu haqida politsiyadagi manbasiga tayanib, "France press" ma'lum qildi. 

Bir necha o‘nlab muhojirlar ishtirokidagi norozilik namoyishini tarqatish uchun politsiya shovqinli granatalarni qo‘lladi. Agentlik ma'lumotlariga ko‘ra, muhojirlar huquqni muhofaza qilish organlari xodimlariga toshlar otishgan, chiqindi qutilarini yoqib yuborishgan. Oxir-oqibat politsiya tartib o‘rnatishga muvaffaq bo‘lgan. 

Muhojirlar lageri yaqinidagi norozilik aksiyasi suriyalik qochqinlar ishtirokidagi YTHdan keyin boshlangan. Dastlabki ma'lumotlarga ko‘ra, o‘tib ketayotgan avtomobil suriyalik 35 yoshli ayol va uning 10 yoshli qizini bosib ketgan, bundan tashqari yana bir bola jarohat olgan. Mashina boshqaruvida bo‘lgan keksa haydovchi qo‘lga olingan. 

Muhojirlik inqirozi boshlangan vaqtdan beri Gretsiya orqali taxminan 1,5 million qochqin va muhojir Yevropaga o‘tgan. Joriy yilning fevralidan migratsiya "bolqon yo‘li" yopib qo‘yilgan va buning natijasida 60 ming kishi Gretsiyada bloklanib qolgan.