Qirg‘izistonda ikki konchining jasadi topildi

Qirg‘iziston Favqulodda vaziyatlar vazirligi qutqaruvchilari Tosh-Ko‘mir shahridagi tumanlardan birida joylashgan shaxta ichidan ikki konchining jasadini olib chiqishgan, yana ikki nafar inson kasalxonaga olib ketilgan. Bu haqda mahkama matbuot xizmati xabar bergan.

Kuni kecha FVV “Shimoliy” ko‘mir konida o‘pirilish sodir bo‘lganini ma'lum qilgandi. Voqea juma kuni yuz bergan. Bedarak yo‘qolganlarni qidirish ishlariga maxsus qidiruv-qutqaruv bo‘linmalari mutaxassislari jalb etildi.

“Qidiruv ishlari davomida ikki fuqaroning jasadi topildi. Ular o‘likxonaga yetkazildi”, - deya xabar berdi matbuot xizmati. Yana bir konchi og‘ir ahvolda kasalxonaga yetkazilgan.

“To‘rtinchi konchini qidiruv ishlari 11 soatdan ortiq davom etdi. U tirik holda topildi va Tosh-Ko‘mir kasalxonasiga olib ketildi”, - deya xabar qilishgan FVVda.

Mahkama ma'lumotlariga ko‘ra, barcha to‘rt inson noqonuniy tarzda ko‘mir qazib olish bilan shug‘ullangan.