17 yanvarda Yevroparlament rahbari lavozimiga saylovlar bo‘lib o‘tadi

Belgiyaning sobiq bosh vaziri Gi Verxofstadt va yana 6 nafar yevrodeputat Yevroparlament (YeP) rahbari lavozimiga o‘z nomzodlarini qo‘ydilar. Buni Strasburgdagi navbatdagi yig‘ilishning ochilishida YeP spikeri Martin Shults ma'lum qildi. 

Gi Verxofstadt Belgiya bosh vaziri lavozimini 1999-2008 yillar egallagan. Undan tashqari, bu lavozimga 2014 yilda YeP spikeri vazifasini vaqtinchalik bajargan Janni Pitella (Italiya), Laurentsiu Rebega (Ruminiya), Xelga Stevens (Belgiya), Jin Lambert (Buyuk Britaniya); Antonio Tayyani (Italiya) va Eleonora Forentsa (Italiya) o‘z nomzodlarini qo‘ydilar.

YePning yangi raisi saylovi 17 yanvarda Strasburgda 09:00da boshlanadi. Saylovlar uch bosqichda o‘tadi, g‘olib mutlaq ko‘pchilik ovoz to‘plashi kerak bo‘ladi. Agar uch bosqich natijasiga ko‘ra g‘olib aniqlanmasa, qo‘shimcha 4-bosqich bo‘ladi va unda 3-bosqichda eng ko‘p ovoz to‘plagan ikki nomzod kurashadi. "Bu Yevroparlamentga barcha 750 deputat keladigan kamdan-kam bo‘ladigan kunlardan biri bo‘ladi, shu sababli ovoz berish oldidan shaxsingizni tekshirish uchun guvohnomalaringizni o‘zingiz bilan olib kelishni unutmang", deb aytdi Martin Shults deputatlarga yuzlanib.