BAA aviakompaniyalari Tramp farmoyishi qurbonlariga yordamga keladi

Amirlikning Emirates va Etihad aviakompaniyalari AQShning migratsion farmoni ostidagi, aholisi asosan musulmonlardan iborat olti mamlakat yo‘lovchilarini tashishga shay. Gulf Business shu haqida xabar berdi.

Bundan avval Merilend shtatining federal sudyasi AQSh prezidenti Donald Trampning yangi farmonini vaqtinchalik 90 kunga bloklagandi. Unga qadar esa Havayidagi sudya mamlakat bo‘ylab qaror ijrosini to‘xtatib qo‘ygani haqida xabar berilgandi. Tramp mazkur qarorni siyosiy deb atadi va AQSh Oliy sudigacha yetib borishga va'da berdi. 

Endi esa AQShga ketayotgan bu (Eron, Liviya, Suriya, Somali, Sudan va Yaman fuqarolari) yo‘lovchilar BAA aviakompaniyalari bortiga qo‘yiladi. Emirates aviakompaniyasi vakilining so‘zlariga ko‘ra, buning uchun yo‘lovchilarning zarur hujjatlari ham o‘zlari bilan birga bo‘lishi kerak.

Yana bir aviakompaniya — Etihad Airways — zarur hujjatlar taqdim etilgan holatda AQSh reyslariga barcha millat yo‘lovchilarini qo‘yishda davom etishini ma'lum qilgan. 

AQSh prezidenti Donald Tramp 6 mart kuni Yaqin Sharq va Shimoliy Afrikaning aholisi asosan musulmonlardan iborat bo‘lgan olti mamlakat fuqarolari uchun vaqtinchalik taqiqlovni joriy qildi.