Yaponiyada jazirama tufayli mingga yaqin kishi shifoxonaga yotqizildi

Yaponiyaning aksar hududida jazirama ob-havo hukm surayotgani aholining keksa qatlamiga salbiy ta'sir ko‘rsatmoqda. Buning natijasida bir hafta mobaynida mingga yaqin kishi shifoxonalarga yotqizildi. Jabrlanganlarning yarmiga yaqini 65 yoshdan katta kishilardir.

Yaponiya tez tibbiy yordam xizmatining 15-21 may kunlariga doir taqdim etgan ma'lumotlarida shu haqda so‘z boradi. Bunda eng jiddiy jabrlanganlar Tokio shahri va Aiti, Osaka, Xyogo, Saitama va Kanagava prefekturalarida ekani ta'kidlangan.

Yaponiya bosh meteorologiya agentligiga ko‘ra, jazirama ob-havo yaqin kunlarda mamlakatning katta qismida saqlanib turadi. Mutaxassislar havo harorati yuqorilagani sababli sovutgichlardan foydalanish, ochiq havoda quyosh tig‘ida ko‘p qolmaslik va ko‘p suv ichishni tavsiya qilishmoqda.