"Yandeks"ning Ukrainadagi ofislari yopilmoqda

"Yandeks" kompaniyasi Kiyev va Odessadagi ofislarini yopmoqda, deb ma'lum qildi "Yandeks"ning jamoatchilik bilan aloqalar bo‘yicha direktori Ochir Manjikov.

"Yandeks. Ukraina" kompaniyasi sanksiyalar ro‘yxatiga kiritilgan va Ukrainada faoliyat olib borolmaydi. Jumladan, kompaniyaning barcha hisob raqamlari to‘sib qo‘yilgan va biz xodimlarga maosh to‘lay olmayapmiz", deb ma'lum qildi Manjikov.

Avvalroq Ukraina huquq-tartibot idoralari "Yandeks" ofisida tintuv o‘tkazgani ma'lum qilingandi. Ukraina xavfsizlik xizmati kompaniya xodimlarini davlatga xiyonat qilish va ukrainaliklarning shaxsiy ma'lumotlarini berishda gumon qilib, tergov tadbirlari tashkil etgan. Shuningdek, tergov tadbirlari Ukraina hukumatining "Yandeks" resurslari hamda "VKontakte" va "Odnoklassniki" ijtimoiy tarmoqlarini taqiqlagani bilan ham bog‘langan.