Yotoqxonada yashovchilar Toshkent propiskasini olishi mumkin bo‘ladi

Vazirlar Mahkamasi O‘zbekiston Respublikasida davlat uy-joy fondini xususiylashtirish to‘g‘risidagi Nizomga o‘zgartirish kiritdi, deb xabar bermoqda Norma.uz.

Hujjatga ko‘ra, turar joy uylari maqomini olgan yotoqxonalarda doimiy ravishda yashovchi shaxslar, Toshkent shahri va viloyatida 2015 yil 15 sentabrga qadar berilgan idora hujjati (order) asosida va yashash joyida ro‘yxatga olingan bo‘lsa, ushbu uy-joyni xususiylashtirish huquqini qo‘lga kiritishdi.

Xususiylashtirish imkoniyati 2018 yil 1 iyulgacha taqdim etiladi. Bu sanaga qadar Toshkent shahri va viloyatida ko‘rsatilgan xonadonlarni xususiylashtirish bo‘yicha kelishuvlarni davlat ro‘yxatidan o‘tkazish va notarial tasdiqlashga ruxsat berildi.

Shu tariqa xususiylashtirilgan xonadonlar egalari Toshkent shahri yoki viloyatida ushbu uy-joy maydoniga doimiy propiska qilinishlari mumkin.