«Real»ning yana bir futbolchisi Neymarni jamoada ko‘rishni istamoqda

«Real» yarim himoyachisi Daniel Sebalos «PSJ» futbolchisi Neymar bilan Madrid klubi sharafini birgalikda himoya qilishga qarshi bo‘lmasligini aytib o‘tdi. U Neymar avval «Barselona»da to‘p surgani ahamiyatga ega emasligini ta'kidlagan.

Bundan avvalroq «Real» sardori Serxio Ramos Neymar bilan jamoadosh bo‘lishdan xursand bo‘lishini tan olgandi.

«Ramos Neymarning «Real»ga kelishi biz uchun yaxshi bo‘lishi haqida aytdimi? Madrid klubida eng yaxshi futbolchilar jamlanadi, Neymar esa shunday futbolchilardan biri. Agar bizning sardorimiz shunday degan bo‘lsa, Neymarga men ham eshik ochaman», — deya Sebalosning so‘zlarini keltirgan AS nashri.

O‘tgan haftadan ispan nashrlarida «Real» kelgusida Neymarni sotib olmoqchiligi haqida xabarlar tarqalgandi.