Toshkentga Qozog‘iston bosh vazirining birinchi o‘rinbosari keladi 

2017 yilning 24 noyabr kuni Toshkent shahriga Qozog‘iston Respublikasi bosh vazirining birinchi o‘rinbosari, O‘zbekiston-Qozog‘iston ikki tomonlama hamkorlik bo‘yicha Hukumatlararo komissiyaning hamraisi Asqar Mamin boshchiligida delegatsiya tashrif buyuradi. Bu haqda TIV axborot xizmati xabar bermoqda.

Tashrif dasturiga ko‘ra O‘zbekiston hukumatida uchrashuvlar va muzokaralar o‘tkazish kutilmoqda.

Shuningdek, Qozog‘iston delegatsiyasi ikki tomonlama hamkorlik bo‘yicha Hukumatlararo komissiya hamraislari ishchi yig‘ilishida hamda O‘zbekiston va Qozog‘iston o‘rtasida diplomatik aloqalar o‘rnatilganligining 25 yilligiga bag‘ishlangan qo‘shma tadbirlarda ishtirok etadi.