Surxondaryo viloyat hokimi murojaatlarni “Telegram” messenjeri orqali qabul qiladi

Surxondaryo viloyat hokimi Erkinjon Turdimov xalq bilan muloqot qilish, ularni qiynayotgan muammo va kamchiliklarni eshitish, takliflarni o‘rganish maqsadida “Telegram” messenjeri orqali xalq bilan ko‘prik o‘rnatgan.

Surxondaryo viloyati aholisi Telegram messenjerida +998 (97) 350-18-47 raqami orqali o‘z murojaatlarini viloyat hokimi Erkinjon Turdimovga yo‘llashlari mumkin. Yo‘llangan murojaatlar, albatta, o‘rganib chiqiladi va ularni yechish yo‘llari izlanadi, deb xabar beradi KUN.UZ’ga viloyat hokimligi matbuot xizmati.

Shu o‘rinda ta'kidlab o‘tmoqchimizki, fuqarolar murojaati va joylardagi muammolarni o‘rganish borasida zamonaviy texnologiyalardan foydalanish juda yaxshi samara beradi. Bu masalalarning o‘z vaqtida va tezkor hal etilishiga sabab bo‘ladi. O‘zbekistonning boshqa viloyatlaridagi hokim va ijro hokimiyati vakillari ham zamonaviy texnologiyalardan foydalangan holda o‘z faoliyatlarini amalga oshirishsa, maqsadga muvofiq bo‘lar edi.