Toshkentda harbiy-vatanparvarlik festivali bo‘lib o‘tadi

Joriy yilning 12 yanvar kuni soat 10:00da O‘zbekiston Respublikasi Mudofaa vazirligi tomonidan poytaxtning “Navro‘z” istirohat bog‘ida (Anhor-Lokomotiv istirohat bog‘i oldidagi Shayxontohur va Abdulla Qodiriy ko‘chalari chorrahasida) “Armiya va yoshlar” deb nomlangan harbiy-vatanparvarlik festivali o‘tkaziladi. Bu haqda KUN.UZ’ga mudofaa vazirligi matbuot xizmati xabar berdi.

Festival dasturidan harbiy texnika va qurol-aslaha namoyishi, harbiy xizmatchilar va jangovar texnikalarning tantanali marsh bilan o‘tishi, barcha kuch tuzilmalari harbiy orkestrlari va Qurolli Kuchlar Markaziy hamda Ichki ishlar va MXX Chegara qo‘shinlari ashula va raqs ansambllari xonandalarining konsert dasturi, harbiy xizmatchilarning ko‘rgazmali chiqishlari, dala oshxonasi faoliyati o‘rin olgan.

Shu bilan birga, sog‘lom turmush tarzini targ‘ib etish maqsadida uzoq masofaga yugurish aksiyasi o‘tkaziladi. Kontsert dasturida estrada xonandalari ishtirok etadi.