«Chinozlik Ahmadboy»ga nisbatan sud hukmi o‘qiladi

Jinoyat ishlari bo‘yicha Toshkent viloyati sudi chinozlik «Ahmadboy» nomi bilan mashhur bo‘lgan Ahmadjon Tursunboyev ishi bo‘yicha yakuniy sud majlislarini o‘tkazmoqda.

«Kun.uz» manbasi xabar berishicha, shu yilning 16 fevralida sudlanuvchi Ahmadboy va uning sheriklariga so‘nggi so‘zni aytish imkoni beriladi. 19 fevral kuni esa sud hukmi e'lon qilinadi.

Sud majlislari jinoyat ishlari bo‘yicha Toshkent viloyati sudida (Toshkent shahri, Rustaveli ko‘chasi, 93-uy) bo‘lib o‘tadi.

«Chinozlik Ahmadboy» nomi ostida xalq o‘rtasida tanilgan moliyaviy piramida asoschisi Ahmadjon Tursunboyev 2016 yil iyun oyi o‘rtalarida huquq-tartibot organlari tomonidan qo‘lga olingan edi. 

O‘shanda O‘zMTRKning bir necha telekanallarida Ahmadboyning faoliyatiga bag‘ishlangan «Ahmad vasvasasi» nomi ostida hujjatli film efirga uzatilgan, ko‘rsatuvda ashyoviy dalil sifatida olingan mablag‘lar 13 mlrd. 139 mln. so‘m va 12 mln. AQSh dollari namoyish etilgandi.
 
U va sheriklari Jinoyat Kodeksining 177-moddasi 3-qismi «a» va «b» bandi (valyuta qimmatliklarini noqonuniy yo‘l bilan olish yoki sotish), 188-moddasi (davlat ro‘yxatidan o‘tmasdan tadbirkorlik faoliyati bilan shug‘ullanib, juda katta miqdorda nazoratsiz daromad ko‘rish), 189-moddasi (Savdo qilish yoki xizmat ko‘rsatish qoidalarini buzish), 190-moddasi 2-qismi «a» va «v» (Lisenziyasiz faoliyat bilan shug‘ullanish) bandlarida ko‘zda tutilgan jinoyatlarni sodir etganlikda ayblangan.

Dastlabki sud majlislari 2017 yilning avgustida bo‘lib o‘tgandi.