Toshkentda avtobusning ariqqa qulashiga sababchi bo‘lgan Nexia qidirilmoqda

12 may kuni soat 14:52da Toshkentning Yashnobod tumanida salonida 20 nafar yo‘lovchisi bo‘lgan 119-sonli Isuzu avtobusi ishtirokida yo‘l transport hodisasi sodir bo‘ldi. 

Gazeta.uz’ning ma'lum qilishicha, Ohangaron ko‘chasi bo‘ylab Qo‘yliq 1-mavzesi tomonga harakatlanib ketayotgan avtobus (davlat raqami 01 023 EDA) oldidan fil suyagi rangidagi Nexia avtomobili keskin o‘ngga burilishi oqibatida Isuzu haydovchisi boshqaruvni yo‘qotib, mashina Tolariq arig‘iga tushib ketgan.

Bu paytda avtobusning tezligi 27 km/soatni tashkil etgan. Voqea sababchisi bo‘lgan Nexia haydovchisi mashinasida hodisa joyidan yashiringan.

«Toshshahartransxizmat»da xabar qilinishicha, voqea natijasida yo‘lovchilardan hech kim jabrlanmagan, biroq avtobus haydovchi — Abdurashid Qo‘ziboyev (1981 y. t.) jarohatlangan. Unga bosh miya chayqalishi tashxisi bilan Respublika nevrologiya markazida ambulator davolash yordami ko‘rsatildi.

Hozirda Toshkent IIBB YHHB tomonidan ushbu Nexia avtomobili qidirilmoqda. Mazkur voqeaga guvoh bo‘lganlardan «Toshshahartransxizmat» harakat xavfsizligi bo‘limi xodimlariga (+99899 848−69−99) yoki IIBB YHHBga (230−94−52) xabar berish so‘raldi.