Mozambikda Afrikadagi eng uzun osma ko‘prik ochildi

Afrikaning Mozambik davlatida “qora” qit'adagi eng uzun osma ko‘prik ochildi. Bu haqda “Sinxua” axborot agentligi xabar berdi. 

Ikkita minorali 3 kilometrlik ko‘prik Hind okeanidagi Maputu ko‘rfazi ustidan o‘tgan. Ko‘prik Xitoy kompaniyalari tomonidan tashabbus bildirilgan Link Roads loyihasining bir qismi hisoblanadi. Ko‘prik qurilishi Xitoy tomonidan moliyalashtirilgan.

Mozambik hukumati ko‘prik mamlakatda sayyohlik va iqtisodiyotning rivojlanishiga turtki berishiga umid qilmoqda. U Mozambikning shimoli va janubini bog‘lovchi transport arteriyasiga aylanadi. Ko‘prikning ochilish marosimi Xitoy elchisi ishtirokida bo‘lib o‘tgan.

2009 yildan boshlab Xitoy Afrikaning bosh hamkori hisoblanadi. Xitoy Afrika davlatlaridan tovarlar import qiladi va bu davlatlar iqtisodiyotiga sarmoyalar kiritadi hamda buning evaziga Afrika davlatlari tabiiy zaxiralarini olish imkonini oladi.