Hazoraspda yirik yengil sanoat kompleksi ishga tushirildi

Xorazm viloyati Hazorasp tumani markazida «Hazorasp tekstil» yirik yengil sanoat kompleksi ishga tushirildi, deb xabar beradi Kun.Uz muxbiri.

24 may kuni korxonaning tantanali ochilish marosimi o‘tkazildi. Unda Xorazm viloyati hokimi Farhod Ermanov, tuman hokimliklari va davlat idoralari xodimlari, korxona va tashkilot rahbarlari, mehnat faxriylari, san'atkorlar ishtirok etishdi

«Hazorasp tekstil» kompleksidagi ip-kalava ishlab chiqarish loyihasi O‘zbekiston Respublikasi Prezidentining qarorlariga muvofiq, jami 80 milliard so‘mlik investitsiya mablag‘i o‘zlashtirilgan holda, «Asakabank» mablag‘lari va «Vikkot Impeks» MChJ investitsiyalari hisobiga amalga oshirildi. Korxonadagi uskunalar Shveytsariyaning «Riter mashin vorks LTD» kompaniyasi tomonidan yetkazib berildi.

«Hazorasp tekstil» korxonasida yiliga 5 ming tonna ip-kalava ishlab chiqarish quvvatlari yaratilgan bo‘lib, mahsulotning 80 foizini eksport qilish imkoniyati mavjud. Bu loyihani amalga oshirilishi orqali 200ta yangi ish o‘rinlari yaratildi.