Uyali telefonlarni yashirincha olib kirish rejasi fosh etildi

O‘zbekistonda bojxonachilar tomonidan uyali aloqa vositalari va aksessuarlarining noqonuniy aylanmasiga qarshi keskin kurash olib borilmoqda. 

Shunga qaramay ayrim fuqarolar tomonidan turli nayranglar ishlatilib, uyali aloqa vositalarini olib kirishga bo‘lgan urinishlar hamon uchrab turibdi.

Uyali telefonlarni yashirincha olib kirish rejasi bojxonachilar tomonidan fosh etildi. Bu haqda O‘zbekiston Respublikasi Davlat bojxona qo‘mitasi rasmiy saytida ma'lum qilindi.
 
Jumladan, Toshkent viloyati bojxona boshqarmasi Kontrabanda va bojxona konunchiligi buzilishiga qarshi kurashish bo‘limi xodimlari  tomonidan Toshkent viloyati Ohangaron tumanida tezkor tadbir o‘tkazilib, uning davomida Toshkent viloyati Ohangaron tumanida fuqaro S.O. boshqaruvida bo‘lgan “Lasetti” rusumli avtoulov to‘xtatilib, belgilangan tartibda tekshirildi.

Natijada, avtoulov yukxonasida yo‘lovchi fuqaro T.Z. tomonidan tegishli hujjatlarsiz, umumiy qiymati 1 milliard 36 million so‘mlik 41 dona mobil telefon va 795 dona qo‘l soati olib ketilayotganligi aniqlandi.

Hozirda ushbu holat yuzasidan bojxona organlari tomonidan surishtiruv harakatlari olib borilmoqda.