Shifokorlar yagona ma'lumotlar bazasida ro‘yxatdan o‘tishga majbur bo‘ladi

O‘zbekistonda shifokorlar va provizorlar (yuqori malakali farmatsevt, apteka xodimi - tah.) ro‘yxatga olinadigan Uzhealth CRM shifokorlar va farmatsevtlarning yagona elektron ma'lumotlar bazasini ishlab chiqish rejalashtirilgan. Hukumatning tegishli qarori loyihasi Innovatsion sog‘liqni saqlash milliy palatasi tomonidan ishlab chiqilgan.

Hujjatda 2021 yil 1 yanvardan boshlab Innovatsion sog‘liqni saqlash milliy palatada ro‘yxatdan o‘tmagan shifokorlar va farmatsevtlarning faoliyati taqiqlanishi belgilab qo‘yilgan.

Bu shifokorlar va farmatsevtlarni davlat ro‘yxatiga olishning normativ-huquqiy va tashkiliy asoslarini shakllantirish, shuningdek sog‘liqni saqlash sohasining kadrlar salohiyati to‘g‘risida ishonchli tibbiy va statistik ma'lumotlarni to‘plash hamda tahlil qilish maqsadida amalga oshiriladi.

Shifokorlar va provizorlarni ro‘yxatga olish, ro‘yxatdan o‘tgan shifokorlar va provizorlarning yagona elektron ma'lumotlar bazasini shakllantirish hamda yuritish, ro‘yxatga olishni to‘xtatib turish va tugatish Innovatsion sog‘liqni saqlash milliy palatasiga yuklatilgan.

Uzhealth CRM tizimini ishlab chiqishni tender savdolarisiz Online Service Group (OSG) MChJga topshirish rejalashtirilgan.