Namanganda haydovchi Nexia’da piyodani urib yuborib, hodisa joyidan qochib ketdi

Ro‘y bergan hodisa oqibatida piyoda olgan tan jarohatlari tufayli hodisa joyida vafot etgan

Foto: Tergov departamenti

2020 yil 10 fevral kuni soat taxminan 21:00da Chortoq-Kalishox-Hazratshoh 4R-119 avtomobil yo‘lining Chortoq tumani Tinchlik ko‘chasidan o‘tgan 20-km.da noma'lum avtomashina haydovchisi yo‘lning o‘ng chetida harakatlanib ketayotgan piyoda 62 yoshli O.Q.ni urib yuborib, hodisa joyidan yashiringan.

O‘zbekiston Respublikasi IIV huzuridagi Tergov departamenti xabariga ko‘ra, oqibatda O.Q. olgan tan jarohatlari tufayli hodisa joyida vafot etgan.

Olib borilgan tezkor-qidiruv tadbirlari natijasida ushbu jinoyatni Chortoq tumanida yashovchi 27 yoshli M.A. o‘zining boshqaruvidagi “Nexia” rusumli avtomashinasida sodir etganligi aniqlangan.

Mazkur holat yuzasidan Chortoq tuman IIB huzuridagi Tergov bo‘linmasi tomonidan M.A.ga nisbatan Jinoyat kodeksining 266-moddasi 2-qismi (Transport vositalari harakati yoki ulardan foydalanish xavfsizligi qoidalarini buzish) va 117-moddasi 2-qismi (Xavf ostida qoldirish) bilan jinoyat ishi qo‘zg‘atilgan.

Hozirda dastlabki tergov harakatlari olib borilmoqda.