O‘zbekiston Janubiy Koreyadagi fuqarolarini olib kelishni boshladi

1 mart kuni kuni Toshkent vaqti bilan soat 2:40da Uzbekistan Airways aviakompaniyasining HY514 reysi Seuldan Toshkentga yetib keldi.

Sog‘liqni saqlash vazirligi Jamoatchilik bilan aloqalar bo‘limi rahbari Furqat Sanayevning Kun.uz’ga ma'lum qilishicha, reys orqali kelgan samolyotda jami 253 yo‘lovchi bor.

Sog‘liqni saqlash vazirligi Virusologiya ilmiy tekshirish institutining yuqumli kasalliklar bo‘yicha tajribali mutaxassis va epidemiolog-shifokorlari yo‘lovchilarni samolyotdan chiqish vaqtida dastlabki tibbiy ko‘rikdan o‘tkazishdi.

Seuldan olib kelinganlardan 182 nafari O‘zbekiston fuqarolari, 71 nafari xorijiy mamlakatlar fuqarolaridir. Xorijiy fuqarolardan 49 nafari O‘zbekistonda qoladi, 22 nafari esa tranzit yo‘lovchilardir.

Endilikda yo‘lovchilarning 231 nafari (182 o‘zbekistonlik va 49 nafar xorijlik) koronavirus O‘zbekistonga kirib kelishi va tarqalishining oldini olish, xavfsiz sanitariya-epidemiologik holatni ta'minlash hamda aholi salomatligini muhofaza qilish maqsadida maxsus tayyorlangan tibbiyot muassasasiga joylashtiriladi va ikki hafta davomida karantinda saqlanadi. 22 nafar tranzit yo‘lovchilar esa belgilangan tartibda izolyatsiya qilinib, keyinroq Uzbekistan Airways aviakompaniyasi reysi orqali o‘z mamlakatiga uchib ketadi.

Ma'lumot uchun, 1 martdan boshlab Uzbekistan Airways aviakompaniyasi Janubiy Koreyada koronavirus avj olishi va O‘zbekiston hududida virus tarqalishining oldini olish maqsadida Seulga bo‘lgan qatnovlarni vaqtincha to‘xtatgan.

Avvalroq, Toshkentdan Jidda va Madinaga reyslar to‘xtatilgani, u yerdagi o‘zbekistonliklarni qaytarish uchun reyslar tashkillashtirilishi haqida xabar berilgandi.

Eslatib o‘tamiz, O‘zbekiston hukumati fevral oyi boshida Xitoydan uchta reys orqali 600ga yaqin fuqarosini evakuatsiya qilgandi. Ular ham ikki hafta mobaynida karantin hududlarida saqlandi, ularning birortasida koronavirus aniqlanmadi.