Sudlarda ishlar avtomatlashtirilgan tizim orqali taqsimlanadi 

Prezident “Sud ishlarini yuritish tartibi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonunni imzoladi.

Unga ko‘ra, amaldagi “Sudlar to‘g‘risida” qonun yangi 69-1-modda (Sudyalar o‘rtasida ishlarni taqsimlash) bilan to‘ldirildi. Unga ko‘ra, sudlarda ishlar sudyalarning ish hajmi va ixtisoslashuvi hisobga olingan holda, sudyalar o‘rtasida ishlarni taqsimlashga sud muhokamasi natijasidan manfaatdor bo‘lgan shaxslarning ta'sir ko‘rsatishi istisno etiladigan tartibda, avtomatlashtirilgan axborot tizimidan foydalangan holda taqsimlanadi. Sudlarda ishlarni avtomatik tarzda taqsimlash tartibi O‘zbekiston Respublikasi Oliy sudi Rayosati tomonidan tasdiqlanadi.

Shuningdek, mazkur qonun bilan “Xo‘jalik yurituvchi sub'yektlar faoliyatining shartnomaviy-huquqiy bazasi to‘g‘risida”gi qonunining 18-moddasi birinchi qismidagi  xo‘jalik yurituvchi sub'yekt tomonidan talabnomani olgan kundan boshlab unga javob qaytarishi shart bo‘lgan muddat bir oydan o‘n besh kunga qisqartirildi.

Bundan tashqari, mazkur qonun bilan Fuqarolik va Iqtisodiy protsessual kodekslari, Ma'muriy sud ishlarini yuritish to‘g‘risidagi hamda Soliq kodekslarining tegishli moddalariga o‘zgartish va qo‘shimchalar kiritilgan.