Pandemiya sababli 195 mln kishi ishsiz qolishi mumkin - BMT

“Koronavirus inqirozi jahon iqtisodiyotini ishsizlik va nochorlikning tarixiy darajasi bilan retsessiyaga cho‘mdirmoqda”, deb ta'kidlab o‘tishgan BMT mutaxassislari. 

Inqirozdan kichik va o‘rta korxonalar, qishloq xo‘jaligi ishchilari, o‘zini ish bilan ta'minlaganlar, qochqinlar va mehnat migrantlari eng ko‘p jabr ko‘rishi mumkin.

BMTda ta'kidlanishicha, inqirozning erkaklar va ayollarga ta'siri ham turlicha bo‘ladi. “Avvalroq ham mavjud bo‘lgan gender tengsizligi hisobiga ayollar iqtisodiyot tiklanishi vaqtida yangi ish qidirishda yoki tadbirkorlik imkoniyatlaridan foydalanishga urinishda qiyinchiliklarga duch kelishlari mumkin”, deyilgan hujjatda.

Oxirgi ma'lumotlarga ko‘ra, dunyoda koronavirusga chalinganlar soni 3 mlndan oshdi. Dunyoning deyarli  barcha davlatlarida karantin choralari kiritilgan. Biroq cheklovlar ortida kichik biznes, xususiy tadbirkorlar kasodga uchramoqda. Ko‘plab ishchilar majburiy ta'tilga jo‘natilmoqda yoki bo‘shatilmoqda.