Eronda dushanbadan boshlab masjidlar ochiladi

Eronning qator tumanlaridagi masjidlar dushanba kunidan ochilishi rejalashtirilgan. Bu haqda mamlakat prezidenti Hasan Ruhoniy ma'lum qildi.

Uning so‘zlariga ko‘ra, mamlakatning koronavirus yuqish xavfi minimal deb topilgan 132ta tumanidagi masjidlar ochiladi.  

Hukumat karantin choralarini bosqichma-bosqich yumshatish rejasini ishlab chiqmoqda. O‘tgan haftada Ruhoniy yaqin vaqt ichida cheklov choralari yumshatiladigan hududlar ro‘yxati e'lon qilinishini ma'lum qilgandi.

Mamlakatda koronavirus sababli kiritilgan cheklovlar bekor qilina boshlandi – do‘konlar, bog‘lar va bozorlar ochilgan, shaharlararo avtomobil yo‘llarida harakatlanish tiklangan.

Eronda koronavirusga chalinganlar soni 97,4 mingdan oshgan, 6200 kishi vafot etgan.