Termizda «Yosh chegarachilar» harbiy-akademik litseyi ochiladi

Norma’ning yozishicha, quyidagilar litseyning asosiy vazifalari hisoblanadi:

• o‘quvchilarda xalqimizning ma'naviy-ma'rifiy qadriyatlariga, uning madaniyati va urf-odatlariga chuqur hurmatni, ularda halollik, vatanparvarlik, sadoqat, fidokorlik singari shaxsiy xislatlarini, shuningdek milliy g‘urur tuyg‘ularini shakllantirish;
• o‘quvchilarda keng dunyoqarash, intellektual salohiyat, ijodiy va tahliliy fikrlashni rivojlantirish, tabiiy va aniq fanlar, xorijiy tillar va zamonaviy axborot texnologiyalari bo‘yicha mustahkam bilimlarni shakllantirish, shuningdek ularga harbiy ishdagi boshlang‘ich bilimlarni singdirish;
• notiqlik va yetakchilik xislatlariga ega, jismonan rivojlangan, chidamli, mard va jasur Vatan himoyachilarini, shuningdek respublika Qurolli Kuchlari va davlat xizmati uchun kadrlar zaxirasini shakllantirish maqsadida respublikaning oliy, oliy harbiy va ixtisoslashtirilgan ta'lim muassasalariga o‘qishga kirishi uchun munosib nomzodlarni tayyorlash va b.

 Hujjatda belgilanishicha:

• litsey Davlat xavfsizlik xizmati muassisligidagi davlat ta'lim muassasasi hisoblanadi;
• qabul va o‘quv jarayoni 2021/2022 o‘quv yilidan boshlanadi;
• litseyda o‘quv jarayoni davomiyligi 2 yil bo‘lib, yillik qabul kvotasi 100 nafarni tashkil etadi;
• litsey Termiz davlat universiteti va O‘zbekiston Respublikasi Qurolli Kuchlar Akademiyasiga biriktiriladi. 

Hujjat bilan litseyning tashkiliy-shtat tuzilmasi, litsey to‘g‘risidagi nizom, litsey faoliyatini tashkil qilish va uning o‘quv-tarbiya jarayonini takomillashtirish bo‘yicha «yo‘l xaritasi», shuningdek uning infratuzilmasi, o‘quv va moddiy-texnik bazasini takomillashtirish bo‘yicha chora-tadbirlar dasturi tasdiqlangan.
 
Ta'lim davlat, rus va ingliz tillarida olib boriladi.
 
Litseyga kirish tartib-taomili dastlabki tanlash, harbiy-kasbiy tanlov va test sinovlarini o‘tkazish yo‘li bilan amalga oshiriladi.
 
Hujjat 11.08.2020 yildan kuchga kirgan.