Avstriya va Germaniyada karantinga qarshi namoyishlar bo‘lib o‘tdi

Venada bir necha yuz kishi hukumatning koronavirusga qarshi kurash bo‘yicha choralariga qarshi namoyishga chiqdi. Xabar qilinishicha, ayrim qatnashchilar namoyishlarda ishtirok etish uchun boshqa shaharlardan avtobuslarda kelgan.

Namoyishchilar mamlakatda karantin choralari yumshatilishini va kansler Sebastyan Kursning iste'foga chiqishini talab qilishdi. Politsiya namoyishchilarga qarshilik qilmadi, ammo ularning niqobda ekanligi va ijtimoiy masofaga rioya qilishini tekshirib turdi. 

Shu kuni Germaniyaning Saksoniya va Saksoniya-Anxalt federal yerlarida ham norozilik aksiyalari bo‘lib o‘tdi.

Turli shaharlardan kelgan 350dan ortiq kishi avtoyurishlar o‘tkazdi. Ular avtomobillari oynalariga cheklovlar hamda koronavirusga qarshi emlash kampaniyasi tanqid qilingan turli shiorlarni yopishtirib olishdi.

Shu bilan birga, Leypsigda emlash kampaniyasi va koronavirusga qarshi kurashish choralari tarafdorlari ham namoyishga chiqdi. Politsiyaning ma'lumot berishicha, 1000ga yaqin kishi mototsikl va velosipedlarda shahar markaziga yig‘ilib, hukumat tomonidan ko‘rilayotgan choralarni qo‘llab-quvvatlashlarini bildirgan.