Xotira va qadrlash kuniga bag‘ishlangan «Dog biatlon» musobaqasi o‘tkazildi

Kecha, 7 may kuni Toshkent viloyatida bo‘lib o‘tgan musobaqada Mudofaa vazirligining 2 ta erkaklar va 1 ta ayollar jamoasi, Ichki ishlar va Favqulodda vaziyatlar vazirliklarining jamoalari, Davlat xavfsizlik xizmatining «Burgut» maxsus bo‘linmasi jamoasi, DXX Chegara qo‘shinlari jamoasi, Milliy gvardiya hamda Davlat bojxona qo‘mitasi jamoalari o‘z xizmat itlari bilan qatnashdi.

Musobaqaning dastlabki kunlarida ishtirokchilar dastlab 3200 metr masofaga yakka tartibda yugurish bilan birga belgilangan nishonni mo‘ljalga olish bo‘yicha shartni bajardi. Ikkinchi kunda esa, musobaqa ishtirokchilari 300 metrlik masofaga to‘siqlarni xizmat iti bilan yengib o‘tgan holda yugurish shartini bajarishdi.

Musobaqa finali - «Dog biatlon estafeta»da esa ishtirokchilar yelkasiga 3 kgdan ortiqroq biatlon qurolini osgan holda, xizmat itlari bilan birgalikda 1600 metr masofaga yugurishdi.

Mazkur masofaning yarmi bosib o‘tilgach, xizmatchilarda biatlon qurolidan foydalanib, 5 ta nishon urish vazifasi ham bor edi. Tekkizilmagan har bir nishon uchun xizmatchiga qo‘shimcha 100 metrlik jarima yo‘laklari qo‘shiladi.

Musobaqaning final jarayonlarini Mudofaa vaziri, general-leytenant Bahodir Qurbonov, kuch tuzilmalari doxil vazirlik va idoralar vakillari, Chirchiq shahar hokimi Davron Hidoyatov, qurolli kuchlar faxriylari, OAV vakillari va keng  jamoatchilik kuzatib bordi.

Yakuniy natijalarga ko‘ra, umumjamoa hisobida:

-      III o‘rin - Milliy gvardiya Qo‘riqlash xizmati, IIV Qorovul qo‘shinlari, DXX «Burgut-1» jamoalariga;

-      II o‘rin - IIV terma jamoasiga;

-      I o‘rin - Mudofaa vazirligining erkaklar va ayollar jamoalariga nasib qildi.

Shuningdek, musobaqada «Dog biatloni yakka tartibda yugurish», «300 metrli to‘siqlardan xizmat itlari bilan o‘tish», «G‘alabaga bo‘lgan kuchli irodasi uchun», «Dog biatloni 3200 metr masofaga yakka tartibda yugurish», «Dog biatlon estafetasi» kabi qator nominatsiyalar bo‘yicha ham g‘oliblarga sovg‘alar topshirildi.