BMT: Shimoliy Koreya 2017 yildan beri birinchi yadroviy sinovga tayyorlanmoqda

BMT ma’lumotlariga ko‘ra, Shimoliy Koreya 2017 yildan buyon ilk yadro sinovini o‘tkazishga tayyorlanmoqda. So‘nggi oylarda mamlakat shimolidagi yerosti poligonida qurilish ishlari olib borilayotgani kuzatilmoqda. Bu haqda 5 avgust, juma kuni BMTning maxfiy hisobotiga tayanib, dpa agentligi xabar berdi.

«Pungeri» yadro poligonidagi ishlar yadroviy qurol yaratish uchun qo‘shimcha yadro sinovlarini o‘tkazishga zamin yaratmoqda», — deyiladi hisobotda. BMTning ta’kidlashicha, bu joyning sun’iy yo‘ldoshdan olingan suratlari KXDR «Pungeri»dagi tunnellar tarmog‘ini ta’mirlayotgani, shuningdek, 2018 yilda AQSh bilan muzokaralar chog‘ida buzib tashlangan inshootlarni tiklayotganini ko‘rsatmoqda. 

Kuzatuvchilar bir necha oydan beri Shimoliy Koreya ko‘p sonli raketa sinovlaridan so‘ng so‘nggi besh yil ichida ilk yadroviy sinovini o‘tkazishi mumkinligidan xavotirda. Iyun oyida Atom energiyasi xalqaro agentligi (AEXA) ham KXDR 2006 yildan 2017 yilgacha oltita yadroviy sinov o‘tkazgan «Pungeri» poligonida faollikni qayd etgan edi.