ShHT Samarqand sammitiga keladigan xalqaro tashkilotlar ma’lum bo‘ldi

15-16 sentabr kunlari Samarqandda o‘tkaziladigan Shanxay hamkorlik tashkilotiga a’zo mamlakatlar sammitida ishtirok etishini tasdiqlagan xalqaro tashkilotlar ma’lum bo‘ldi.

Rasmiylarga ko‘ra, ShHT sammitida ishtirok etmoqchi bo‘lgan xalqaro tashkilotlar orasida BMT hamda uning Osiyo va Tinch okeani uchun iqtisodiy va ijtimoiy komissiyasi, YuNeSKO, MDH, Kollektiv xavfsizlik shartnomasi tashkiloti (KXShT), Yevroosiyo iqtisodiy kengashi, Osiyoda hamkorlik va ishonch choralari bo‘yicha kengash, Iqtisodiy hamkorlik tashkiloti, Arab davlatlari ligasi kabi tashkilotlar bor.

ShHTning bunday keng formatdagi sammiti ilk bor Samarqandda bo‘lib o‘tishi kutilmoqda.

Ekspertlarning fikricha, bu nufuzi ortib borayotgan va geografik ko‘lami kengayib borayotgan tashkilotga yanada kengrok hamkorlik va muloqot maydonchasiga aylanishi uchun yaxshi imkoniyat ochib beradi.

Avvalroq ushbu sammitda ishtirok etadigan 15 mamlakat rahbarlari nomi e’lon qilingandi.