Rossiyada safarbarlikka qarshi yangi norozilik namoyishlari rejalashtirilmoqda

«Vesna» yoshlar demokratik harakati ruslarni safarbarlikka qarshi yangi noroziliklarga chaqirdi. «Mamlakat bo‘ylab qabrlashtirish faol davom etmoqda. Tez orada minglab yigitlarimiz frontga ketishi mumkin. Biz qarshilik ko‘rsatishimiz mumkin va kerak!» - deyiladi ijtimoiy tarmoqlarda tarqalgan bayonotda.

Aksiyalar 24 sentabrga rejalashtirilgan. 23 sentabr kuni ular bo‘lib o‘tadigan shaharlar tashkilot Telegram-kanalida, to‘planish joylari esa to‘g‘ridan to‘g‘ri aksiya kuni ma’lum qilinadi.

21 sentabr kuni Ukraina bilan urush va Rossiya prezidenti Vladimir Putin e’lon qilgan safarbarlikka qarshi norozilik namoyishlari Rossiyaning ko‘plab shaharlarida bo‘lib o‘tdi. «OVD-Info» inson huquqlari portaliga ko‘ra, 39 shaharda politsiya 1321 kishini qo‘lga olgan. Eng ko‘p qo‘lga olishlar Moskva (538 ta) va Sankt-Peterburgda (479 ta) bo‘lgan. Moskvadagi ba’zi politsiya bo‘limlarida qo‘lga olinganlarga o‘sha joyning o‘zida harbiy xizmatga chaqiruv qog‘ozi topshirildi.

«Vesna» yoshlar demokratik harakati 2013 yil fevral oyida Sankt-Peterburgda «Yabloko», «Mudofaa» va «Birdamlik» mahalliy tashkilotlarining birlashishi natijasida tashkil etilgan. 2022 yil fevral oyidan boshlab u Rossiyada urushga qarshi namoyishlar tashkilotchilaridan biriga aylandi. Harakat 27 fevral (Rossiya bo‘ylab 2800 ga yaqin ), 13 mart (800 dan ortiq ), 2 aprel (200 dan ortiq kishi qo‘lga olingan) va 21 sentabr kunlari norozilik aksiyalarini muvofiqlashtirgan.