Namangan shahrida xalqaro asal festivali o‘tkaziladi

Joriy yil 28–30 oktabr kunlari Namangan shahridagi «Afsonalar vodiysi» istirohat bog‘ida birinchi Namangan xalqaro asal festivali o‘tkaziladi.

Foto: flickr.com

Festival davomida 250 dan ortiq mahalliy va xorijlik asalarichilar o‘z mahsulotlarini namoyish etadi. Tadbir ishtirokchilari asal mahsulotlari, asalarichilik, asal yig‘ish va asalari uylari haqida barcha ma’lumotlarni bilib olish, asal mumidan malham ishlab chiqarish, asalarichilik hunarmandchiligi buyumlarini tayyorlash, asal bir nechta navlarini tatib ko‘rish imkoniga ega bo‘ladi.

Tadbir dasturidan respublikada qishloq xo‘jaligi turizmini rivojlantirish masalalariga bag‘ishlangan «Ilmiy-amaliy konferensiya» va asal ko‘rgazmalari, sport musobaqalari, mehmonlar uchun konsert, asalarichilik sohasidagi yetakchi mahalliy va xorijlik asalarichilik sohasidagi mutaxassislardan mahorat darslari o‘rin olgan.

Festival doirasida «Eng yaxshi qadoqlangan asal» va «Eng tabiiy asal» nominatsiyalari bo‘yicha tanlovlar o‘tkaziladi.