BMT Rossiyaning «Ukrainadagi bioqurol» haqidagi rezolyutsiyasini rad etdi

Hujjat faqat Rossiya va Xitoy tomonidan qo‘llab-quvvatlandi. AQSh, Buyuk Britaniya va Fransiya unga qarshi chiqdi. Qolgan o‘nta davlat betaraf qoldi. Qaror qabul qilish uchun kamida to‘qqiz ovoz kerak edi.

Ukrainaga keng ko‘lamli bosqin boshlanganidan so‘ng, Rossiya Qo‘shma Shtatlar go‘yoki butun dunyo bo‘ylab maxfiy laboratoriyalar tarmog‘ini yaratganini da’vo qilmoqda. 

Rossiya rasmiylari «maxsus operatsiya» deb atagan urush paytida Ukrainada «Pentagonning bevosita ishtirokida biologik qurol komponentlari» yaratilgani haqida go‘yoki dalillar olingan. 

Ukraina prezidenti Volodimir Zelenskiy mart oyi o‘rtalarida bu ayblovlarni rad etdi. AQSh Mudofaa vazirligi vakili ham raddiya berdi.

Bundan oldin Yevropa komissiyasi Vladimir Putinning 27 oktyabrdagi nutqini «Oruellcha» deb atagandi. «Putin nutqida noto‘g‘ri gap to‘g‘ri, to‘g‘ri noto‘g‘ri, haqiqat yolg‘on, yolg‘on esa haqiqatdir», — dedi Yevropa Ittifoqi Tashqi ishlar xizmati matbuot kotibi Nabila Massrali.

Putinning Kiyev «iflos bomba» yaratayotgani haqidagi da’volarini Yevropa komissiyasi vakili asossiz deb atadi. «Rossiya, avvalgidek, o‘z ayblovlarini hech qanday dalil bilan tasdiqlay olmadi», dedi u va Moskvaning Ukrainada biologik qurol ishlab chiqilishi haqidagi yolg‘on da’volarini 24 fevral kuni mamlakatga keng ko‘lamli harbiy bostirib kirishini oqlashga urinish sifatida baholadi.