Janubiy Koreya prezidenti Seul fojiasida politsiyani aybladi 

Davlat rahbari 29 oktyabr kuni Seul shahrining Itevon tumanida Hellouinni nishonlash uchun to‘plangan odamlarning tiqilinchda nobud bo‘lganiga politsiya aybdor ekanini ta’kidladi. 

«Baxtsiz hodisalarning oldini olish uchun kim javobgar? Politsiya. Menimcha, politsiya ko‘plab odamlar to‘planishi kutilayotganini bilmasligi aqlga sig‘maydi», dedi u. 

Shuningdek, prezident huquq-tartibot idoralari xodimlari odamlar to‘planayotganini «to‘rt soat davomida nega bexavotir tomosha qilgani» bilan qiziqdi. Uning ta’kidlashicha, politsiya 112 raqamiga qo‘ng‘iroq bo‘lmagan taqdirda ham chora ko‘rishi kerak edi. 

Fojia 29 oktyabr kuni kechqurun Seulning Itevon tumanida, «Hamilton» mehmonxonasi yaqinida sodir bo‘ldi. Hellouinni nishonlash maqsadida to‘plangan olomon tor xiyobonga yopirilishi oqibatida tiqilinch yuz berdi.  

Fojiada 156 kishi, jumladan 97 nafar ayol halok bo‘ldi.