Shavkat Mirziyoyev Sadir Japarov bilan telefon orqali muloqot qildi

Suhbat avvalida davlat rahbari Qirg‘iziston yetakchisini tavallud kuni bilan qutlab, mustahkam sog‘lik, baxt-saodat va muvaffaqiyatlar, qardosh Qirg‘iziston xalqiga tinchlik-osoyishtalik va ravnaq tiladi.

Oliy darajadagi kelishuvlarga muvofiq O‘zbekiston-Qirg‘iziston yaxshi qo‘shnichilik va strategik sheriklik munosabatlari izchil mustahkamlanib borayotgani, mamlakatlar o‘rtasidagi ko‘p qirrali hamkorlik jadal rivojlanayotgani qayd etildi.

Yaqinda ikki tomonlama hujjatlar – Davlat chegarasi alohida uchastkalari to‘g‘risida shartnoma va Andijon suv ombori suv resurslarini birgalikda boshqarish to‘g‘risida bitim imzolangani va ratifikatsiya qilingani amaliy hamkorlik chuqurlashishiga, davlatlar va butun mintaqa barqaror rivojlanishiga xizmat qilishi ta’kidlandi.

Davlat rahbarlari bo‘lajak muloqotlar kun tartibini sifat jihatidan boyitish maqsadida savdo shartnomalari va investitsiya dasturlari portfelini kengaytirish muhimligini qayd etdi.