Bishkekdagi YeOII sammitida O‘zbekiston nomidan Abdulla Aripov ishtirok etadi

Bugun, 9 dekabr kuni Qirg‘iziston poytaxti Bishkekda Yevroosiyo iqtisodiy ittifoqiga a’zo davlatlar rahbarlari sammiti bo‘lib o‘tmoqda. Ayni vaqtda RF prezidenti Vladimir Putin ham Bishkekka yetib kelgan.

Qirg‘iziston TIV rahbari o‘rinbosari Aybek Moldogaziyev mahalliy nashrlarga bergan intervyusida O‘zbekiston Yevroosiyo iqtisodiy ittifoqida kuzatuvchi maqomiga egaligi va bugungi sammitda O‘zbekiston nomidan bosh vazir Abdulla Aripov ishtirok etishini ma’lum qilgan. 

U O‘zbekiston rahbarining Qirg‘izistonga davlat tashrifi esa keyinroq alohida amalga oshirilishini qo‘shimcha qilgan. 

Ayni vaqtda O‘zbekiston bosh vaziri Abdulla Aripov Bishkekka yetib bordi. «Manas» xalqaro aeroportida uni Qirg‘iziston vazirlar mahkamasi raisi – prezident ma’muriyati rahbari Oqilbek Japarov kutib oldi.

Bundan oldinroq Qirg‘iziston TIV Shavkat Mirziyoyev 10 dekabr kuni ushbu mamlakatga tashrif buyurishi haqida xabar bergan, O‘zbekiston tomoni esa buni tasdiqlamagandi.