Rossiya Makiyivka uchun «qasos operatsiyasi» o‘tkazganini da’vo qildi

Rojdestvo munosabati bilan Rossiya tomonidan joriy etilgan Ukrainada bir tomonlama «o‘t ochishni to‘xtatish» rejimi muddati 8 yanvarga o‘tar kechasi yakunlandi. Ukraina hukumati ma’lum qilishicha, xuddi shu vaqtda Rossiya qo‘shinlari Zaporijjya, Xarkiv va Donetsk oblastlariga bir necha bor zarbalar yo‘llagan.

7 yanvar kuni kechqurun, mahalliy vaqt bilan soat 22:00 atrofida (Moskva vaqti bilan 23:00) Zaporijjya hududini o‘qqa tutish boshlangan, Ukraina bosh prokuraturasi ma’lumotiga ko‘ra, bu jarayon yarim soat davom etgan. Idoraga ko‘ra, shahar rayonlaridan biri baravar o‘t ochish reaktiv tizimidan kassetali o‘q-dorilar orqali o‘qqa tutilgan. Fuqarolik va infratuzilmalar obektlari, shuningdek aholi avtomobillari shikastlangan. «Biz Rossiya bilan birgamiz» («My vmeste s Rossiyey») harakati rahbari Vladimir Rogov ukrain harbiy obektlariga zarba berilganini iddao qilgan.

Mahalliy vaqt bilan soat 23:00 atrofida, Ukraina bosh prokuraturasi ma’lumotiga ko‘ra, rossiyalik harbiylar Belgorod oblasti hududidan Xarkiv atrofidagi Merefa shaharchasiga raketa zarbalari yo‘lladi. «Korxona binosi shikastlangan, bir kishi halok bo‘lgan, tinch aholi vakillaridan yana bir kishi yaralangan», — deyiladi idora xabarida.

8 yanvarga o‘tar kechasi Rossiya qo‘shinlari Donetsk oblastining Kramatorsk shahri tomon yettita raketa zarbasi yo‘llagan. Region harbiy ma’muriyati rahbari Pavel Kirilenkoning so‘zlariga ko‘ra, shaharda ta’lim muassasasi binosi va sanoat obekti shikastlangan. «Dastlabki ma’lumotlarga ko‘ra, otishmalar chog‘ida qurbon bo‘lganlar va yaralanganlar yo‘q», — degan Kirilenko.

RF mudofaa vazirligi Kramatorsk bo‘ylab zarbalarni Ukraina qurolli kuchlarining yangi yil kechasi Donetsk oblastidagi Makiyivka shahriga qilingan hujumga «javob operatsiyasi» deb atadi, Rossiya tomoni Makiyivkadagi kasb-hunar maktabi binosi o‘qqa tutilishi oqibatida 89 nafar harbiysi halok bo‘lganini tasdiqlagan. Rossiya tomoniga ko‘ra, RF qurolli kuchlari Kramatorskdagi ikkita yotoqxonaga zarbalar bergan, ularda jami 1,3 mingdan ortiq ukrain harbiysi bo‘lgan. RF mudofaa vazirligi iddao qilishicha, bu zarbalar natijasida 600 dan ortiq kishi halok bo‘lgan. Ukraina qurolli kuchlari Sharqiy guruhi spikeri Sergey Cherevatiy esa «Suspilne» nashriga RF mudofaa vazirligi ma’lumoti haqiqatga to‘g‘ri kelmasligini bildirdi.

Ukraina Rossiyaning bu zarbalari hali «o‘t ochishni to‘xtatish rejimi» amalda bo‘lgan vaqtda berilganini da’vo qilgan. Ukraina qurolli kuchlari bosh shtabi ma’lum qilishicha, 6 yanvar kuni rossiyalik harbiylar bitta raketa zarbasi yo‘llagan va baravar o‘t ochish reaktiv tizimlaridan 20 ta snaryad uchirgan, 7 yanvar kuni esa to‘qqizta raketa yo‘llagan, aviatsiyadan uchta zarba bergan hamda baravar o‘t ochish reaktiv tizimlaridan 40 ta snaryad uchirgan, jumladan fuqarolik infratuzilmalariga ham. Bosh shtabga ko‘ra, bu zarbalar oqibatida halok bo‘lganlar va jabrlanganlar bor.

Zaporijjya oblasti harbiy ma’muriyati rahbari Oleksandr Staruxning aytishicha, 7 yanvar kuni rossiyalik harbiylar regionda Orexov shahriga gumanitar yordam olib ketayotgan BMT missiyasini o‘qqa tutgan. Jabrlanganlar haqida ma’lumot berilmagan. 6 yanvar kuni, Rojdestvo arafasida, Ukrainadagi eng yirik xususiy energetika kompaniyasi DTEK ma’lumotiga ko‘ra, Rossiya armiyasi issiqlik elektr stansiyasiga zarba yo‘llagan. Kompaniya aynan qaysi IES haqida gap ketayotganiga aniqlik kiritmagan, ammo bu stansiya avval ham o‘qqa tutilgani ma’lum qilingan.

Pentagondagilar ham Ukrainada Rojdestvoda «o‘t ochishni to‘xtatish rejimi» joriy etilganiga qaramay harbiy harakatlar davom ettirilganini ma’lum qildi. «[RF prezidenti Vladimir Putinning] o‘t ochishni to‘xtatish to‘g‘risidagi bayonotiga qaramay, aytishim mumkinki, texnik tomondan o‘t ochishni to‘xtatish rejimida turgan bo‘lsa ham, bugun Ukrainada janglar ketmoqda», — degan AQSh mudofaa vazirining Rossiya, Ukraina va Yevrosiyo masalalari bo‘yicha yordamchisi o‘rinbosari Lora Kuper 6 yanvar kungi brifingda. U Putinning o‘t ochishni vaqtincha to‘xtatish rejimi haqidagi bayonotiga shubha bilan qarashni so‘ragan: «Bu Ukrainaga bostirib kirmasligini aytgan o‘sha odam».

6–7 yanvar kunlari, Ukrainada «o‘t ochishni to‘xtatish rejimi» amal qilib turgan vaqtda, mahalliy rasmiylarning ma’lumotlariga ko‘ra, tinch aholi vakillaridan besh kishi halok bo‘lgan, 20 dan ortiq kishi yaralangan. Ukraina prezidenti ofisi rahbari o‘rinbosari Kirill Timoshenkoning aytishicha, 6 yanvar kuni Donetsk va Xerson oblastlarida uch kishi halok bo‘lib, yana 14 kishi jabrlangan. 6 yanvar kuni halok bo‘lgan va yaralanganlarning aksar qismi — Donetsk oblastiga to‘g‘ri keladi, shu kuni Baxmut o‘qqa tutilgan. Ukraina bosh prokuraturasiga ko‘ra, shaharda ikki kishi halok bo‘lib, yana 13 kishi yaralangan. 7 yanvar kuni Donetsk, Xarkiv va Xerson oblastlarida, Timoshenkoning so‘zlariga ko‘ra, ikki kishi halok bo‘lib, to‘qqiz kishi tan jarohati olgan.

RF mudofaa vazirligidagilar «o‘t ochishni to‘xtatish rejimi»ga amal qilganini, ammo ukrainlarning artilleriya zarbalariga javob qaytarganini tasdiqlashgan. 7 yanvar kuni RF mudofaa vazirligi rasmiysi Igor Konashenkov Rossiya qo‘shinlari «frontning butun tutashuv chizig‘i bo‘ylab o‘t ochishni to‘xtatish rejimiga amal qilgani», artilleriya zarbalari esa Ukraina tomonidan berilganini aytgan. U shuningdek rossiyalik harbiylar Ukraina qurolli kuchlarining o‘t ochgan barcha pozitsiyalari «javob zarbasi» bilan bostirilganini qo‘shimcha qilgan.

Igor Konashenkov 8 yanvar kuni Rossiya e’lon qilgan bir tomonlama «o‘t ochishni to‘xtatish rejimi» vaqtida Ukraina kuchlari front chizig‘i bo‘ylab artilleriya to‘plari va baravar o‘t ochish reaktiv tizimlaridan 500 dan ortiq zarba yo‘llaganini ma’lum qildi.