Dniproda raketa zarbasi oqibatlari, Donbassdagi og‘ir janglar. Urush suratlari

Ukrainada urushning 325-kuni o‘tdi. Asosiy ma’lumotlar:

• Rossiya Ukraina shaharlariga yana raketa zarbalari yo‘lladi. Xarkiv, Lviv, Ivano-Frankovsk, Zaporijjya, Vinnitsa va Kiyev oblastlarida energetika obektlari shikastlangan, Dniproda to‘qqiz qavatli uyning ikki pod’yezdi qulab tushdi;
• Ukraina qurolli kuchlari bosh shtabi Soledar uchun janglar davom etayotganini ma’lum qildi. Bungacha Rossiya mudofaa vazirligi shahar rossiyalik harbiylar nazoratiga o‘tganini xabar qilgandi;
• Buyuk Britaniya  bosh vaziri Rishi Sunak Volodimir Zelenskiy bilan telefon muloqoti chog‘ida London Ukrainaga Challenger 2 tanklarini bermoqchi ekanini tasdiqladi;
• Aktyor Dmitriy Nazarov va uning rafiqasi Olg Vasileva urushga qarshi chiqishgani uchun Chexov nomidagi teatrdan ishdan bo‘shatildi;
• Harbiy prokuratura RF hududida BMT rasmiy saytini bloklashni talab qildi.

Kunning asosiy voqeasi. Rossiyaning Dniprodagi uyga raketa zarbasi

Ukraina shaharlariga navbatdagi zarbalar chog‘ida Rossiya raketalaridan biri Dniprodagi to‘qqiz qavatli uyga kelib tushdi. 15 yanvar tongidagi ma’lumotlarga ko‘ra, kamida 21 kishi halok bo‘lgan, 70 dan ortiq kishi yaralangan. Yana 40 ga yaqin kishining taqdiri noma’lumligicha qolmoqda. Voqea joyida qutqaruv ishlari davom etmoqda.

Soledar atrofidagi harbiy mediklar 

Donetsk oblastining egallab olingan Soledar shahri aholisi evakuatsiyasi 

Shimoliy Don bo‘yida yakson qilingan rus texnikalari

Harbiy mediklar ukrainalik yarador askarni qutqarishga urinishdi. Ammo u halok bo‘ldi

Bu fotosuratlar muallifi, ukrainalik fotograf Konstantin Liberov o‘z kadrlarini butun urush davridagi «eng og‘riqlisi» deb atadi. Jurnalist Luhansk oblastida, tutashuv chizig‘idan ikki kilometr masofada joylashgan tibbiyot punktida yashab, ishlamoqda. Liberovning aytishicha, shu kuni harbiy mediklar boshiga oskolka tekkan askarga yordam berish uchun yo‘l olishgan. U rossiyaliklar vertolyoti yo‘llagan zarbalar oqibatida yaralangan. Mashinada vrach 15 daqiqa davomida uni hayotga qaytarishga uringan, ammo uni saqlab qololmagan.

Luhansk oblastidagi janglar

Hozirda asosiy e’tibor Soledarga jalb etilganiga qaramay, frontning boshqa uchastkalarida, jumladan Luhansk oblastining rossiyaliklar bosib olgan Kreminna rayoni hududida ham janglar olib borilmoqda. Quyida Luhansk oblastida 12 va 13 yanvar kunlari tushirilgan suratlar. 

Ukrainlarning Belarus bilan chegaradagi istehkomlari

13 yanvar kuni Ukraina mudofaa vaziri Aleksey Reznikov Rossiya armiyasi yana Belarus hududidan hujum qilishi mumkinligi to‘g‘risidagi versiyani rad etdi. Reznikovning hisoblashicha, bunday amaliyotga tayyorgarlik ko‘rish uchun hozirda Rossiya armiyasida vaqt ham, resurslar ham yo‘q. Shunga qaramay, Ukraina mamlakat shimolidagi mudofaa chiziqlarini mustahkamlamoqda. 12 yanvar kuni Belarus bilan chegaradosh Roven oblasti rahbari Vitaliy Koval region aholi yashash manzillarini mudofaa qilishga tayyorgarlik ko‘rishda davom etayotganini aytdi. 

Lvivda blekaut

Oktyabr oyidan buyon Ukrainaning muhim infratuzilmalariga raketa zarbalari berib kelinmoqda. Buning oqibatida mamlakatda yengilmas punktlar ochilgan — energiya uzoq vaqt o‘chgan vaqtda odamlar bu yerlarga kelib isinishi va tokdan foydalanishi mumkin. Kiyevdagi Shevchenko parkida 12 yanvar kuni «yengilmas o‘tov» paydo bo‘ldi. Bu ish bilan mahalliy qozoq diasporasi ko‘ngillari shug‘ullanishgan. Ular Ukrainaning yana olti shahrida, jumladan Lvivda ham shu kabi o‘tolar ochishni mo‘ljallagan. Hozirda bu shaharda har kuni soat 8 dan 16 ga qadar tok o‘chirilmoqda — grafik Ukraina energiya tizimidagi vaziyatga bog‘liq.