Bolgariyadagi saylovlar: koalitsiya tuzishda qiyinchiliklar kutilyapti

Bolgariyada bo‘lib o‘tgan navbatdan tashqari parlament saylovlari natijalariga ko‘ra, eng ko‘p ovozni (26,51 foiz) Demokratik kuchlar ittifoqi va 2009 yildan 2021 yilgacha bu lavozimni deyarli uzluksiz egallagan sobiq bosh vazir Boyko Borisov boshchiligidagi eng yirik muxolifat partiyasi «Fuqarolar Bolgariyaning Yevropa taraqqiyoti uchun» (FBeT)dan tashkil topgan blok qo‘lga kiritdi. Saylov natijalari 3 aprel, dushanba kuni Markaziy saylov komissiyasida ovoz berish byulletenlarining 100 foizi ko‘rib chiqilganidan so‘ng ma’lum qilindi.

Yevropaparast va Yevroatlantika ittifoqiga ega bo‘lgan «O‘zgarishlarni davom ettiramiz» va «Demokratik Bolgariya» («O‘DE-DB») partiyalarining natijasi – 24,54 foiz.

Rossiya prezidenti Vladimir Putinga yaqin bo‘lgan millatchilik kayfiyatidagi «Tiklanish» partiyasi 14,15 foiz ovoz bilan uchinchi o‘ringa mustahkamlandi.

Turk ozchilikning manfaatlarini himoya qilgan «Huquq va erkinlik harakati» (HEH) 13,72 foiz ovoz oldi.

«Bolgariya uchun Bolgariya sotsialistik partiyasi (BSP)» 8,94 foiz ovozga ega bo‘ldi.

Saylovning 4 foizlik chegarasidan «Shunday xalq bor» partiyasi ham (4,11 foiz) o‘tdi.

Ayni paytda, Reuters agentligining ta’kidlashicha, oldinda hukumat tuzish uchun qiyin koalitsiya muzokaralari kutib turibdi.

Bu oxirgi ikki yildagi beshinchi saylovdir. Bir qator ekspertlar koalitsiya tuzishga urinishlar yana barbod bo‘lishi mumkinligini va ovoz berish oltinchi marta o‘tkazilishini istisno qilmayapti. Shu bilan birga, aholining hokimiyatga nisbatan ishonchsizligi kuchaymoqda, deydi ekspertlar.

2020 yilda keng tarqalgan korrupsiyaga qarshi ommaviy norozilik namoyishlaridan so‘ng Bolgariya siyosiy boshi berk ko‘chada qolmoqda.