O‘zbekiston vakolatxonasi «NATOga sherik davlatlar kuni» tadbirida ishtirok etdi

12 may kuni Belgiyaning Mons shahrida NATO Yevropadagi qo‘shma qo‘mondonligi qarorgohida tashkilotga a’zo davlatlar va sherik mamlakatlar vakillari ishtirokida «NATOga sherik davlatlar kuni» tashkil etildi, deb xabar bermoqda «Dunyo».

Foto: Dunyo

Tadbirdan maqsad – NATOga a’zo va sherik davlatlarning madaniyati, urf-odatlari, milliy hunarmandchilik mahsulotlari va taomlarini namoyish etish orqali o‘zaro aloqalarni mustahkamlashdan iborat.

Ushbu anjuman NATOning asosiy madaniy tadbirlaridan biri bo‘lib, 2005 yildan beri har yili o‘tkazib kelinadi.

Joriy tadbirda 30 dan ortiq NATOga a’zo va unga sherik davlatlarning 200 dan ortiq vakillari, shuningdek, Tashkilot bosh qarorgohi hamda uning tarkibiy tuzilmalari xodimlari qatnashishdi.

O‘zbekiston vakolatxonasi vakillari o‘zbek xalqining madaniyati, urf-odatlari, milliy an’ana va qadriyatlarini, shuningdek, milliy hunarmandchilik mahsulotlari ko‘rgazmasi namoyish etdilar.

Tadbirda O‘zbekiston va NATO o‘rtasidagi hamkorlikning hozirgi dinamikasi yuqori baholandi, shuningdek, O‘zbekiston vakillarining tashkilot tadbirlarida ishtiroki miqdoriy va sifat jihatidan o‘sib borayotgani e’tiborga loyiqligi ta’kidlandi.