Yevropa Ittifoqi Ukraina g‘allasi importiga cheklovlarni uzaytirdi

Yevropa Ittifoqining beshta davlatiga Ukraina g‘allasini import qilish bo‘yicha cheklovlar 15 sentabrgacha amal qiladi. Keyin Bryussel ularni bekor qilishga va’da berdi.

Foto: Reuters

Yevropa Ittifoqi YeIga a’zo beshta davlat uchun Ukrainadan qishloq xo‘jaligi mahsulotlarining ayrim turlarini olib kirishni vaqtinchalik taqiqlashni 15 sentabrgacha uzaytirdi. Bu haqda 5 iyun, dushanba kuni Yevrokomissiya saytida e’lon qilingan xabarda aytiladi.

2 may kuni Bryussel Ukrainadan Bolgariya, Vengriya, Polsha, Ruminiya va Slovakiyaga bug‘doy, makkajo‘xori hamda kungaboqar urug‘larini olib kirishni vaqtinchalik taqiqlab qo‘ygan edi. Yevropa Ittifoqi 15 sentabrgacha barcha cheklovlarni olib tashlash niyatida ekanligini e’lon qildi, ammo endi ular "alohida holatlar", jumladan, logistika qiyinchiliklari va saqlash hajmining yetishmasligi tufayli talab qilinadi.

Shu bilan birga, chora-tadbirlar “Yevropa Ittifoqining Ukrainani qo‘llab-quvvatlash va dunyoni oziq-ovqat bilan ta’minlash uchun muhim bo‘lgan o‘z g‘allasini eksport qilish qobiliyatini saqlab qolish bo‘yicha qat’iy majburiyatiga mos keladi”, deyiladi Bryussel bayonotida.

Uzoq vaqt davomida Qora dengiz portlari orqali don eksport qilish imkoniyatidan mahrum bo‘lgan ukrainalik fermerlar Yevropa Ittifoqi cheklovlarini o‘ta tanqidiy qabul qildi va ularni bekor qilishni so‘ramoqda.