Prokuror suddan Trampga ish materiallarini oshkor qilishni taqiqlashni so‘radi

Maxsus prokuror Jyek Smitning jamoasi AQSh sobiq prezidenti Donald Trampga nisbatan maxfiy hujjatlar bo‘yicha ish bo‘yicha sudyadan u va uning himoya jamoasi tergov jarayoni doirasida jinoiy ishda taqdim etilgan ayrim materiallarni ommaga oshkor qilishiga yo‘l qo‘ymaslikni so‘radi. Bu haqda CNN xabar bermoqda.

Foto: Timothy A. Clary/UPI

Nashr ma’lumotlariga ko‘ra, Smitning jamoasi prokuratura himoyaga topshirishi kerak bo‘lgan maxfiy bo‘lmagan materiallar orasida «davom etayotgan tergovga oid ma’lumotlar» borligini aytgan. Uning oshkor etilishi bu tergovni xavf ostiga qo‘yishi va ayblov qo‘yilmagan shaxslarni fosh qilishi mumkin.

«Topilgan materiallarga maxfiy va yashirin axborotlar, jumladan, shaxsiy va moliyaviy ma’lumotlar, tergovning «maxfiy» usullarini oshkor etuvchi xabarlar va potensial guvohlar haqidagi ma’lumotlar kiradi», — deyiladi xabarda.