Vazirliklarning ichki audit xizmati faoliyati baholanadi

Vazirlar Mahkamasining «Vazirlik va idoralarning ichki audit xizmatlari faoliyatini baholash tartibi to‘g‘risidagi nizomni tasdiqlash haqida»gi qarori qabul qilindi.

Nizom quyidagi tartiblarni belgilaydi:

• ichki audit xizmati faoliyatini baholash;
• baholash natijalarini rasmiylashtirish va ichki audit xizmati faoliyatini takomillashtirish;
• baholash natijalarini monitoring qilish ularni jamoatchilikka e’lon qilish.

Ichki audit xizmatini baholash Iqtisodiyot va moliya vazirligi tomonidan rejali va rejadan tashqari tartibda amalga oshiriladi.

Rejali baholash xavf tahlili asosida ishlab chiqilgan va tasdiqlangan jadvalga asosan o‘tkaziladi.

Har yili 1 martga qadar tasdiqlangan jadval vazirlik saytida e’lon qilinadi.

Rejadan tashqari baholash quyidagi holatlarda o‘tkaziladi:

• aynan davlat organining murojaatiga asosan;
• taqdim etilgan choraklik hisobotlarni o‘rganish natijasida qo‘shimcha xavflar aniqlanganda.

Nizom bilan baholash mezonlari va savolnoma shakli ham tasdiqlanmoqda.