Sog‘liqni saqlash organlari rahbarlari deputatlar oldida hisobot beradi 

Toshkentda Oliy Majlis Senatining qirq to‘rtinchi yalpi majlisi bo‘lib o‘tdi. 

Unda bir qancha qonunlar, jumladan, «O‘zbekiston Respublikasining ayrim qonun hujjatlariga sog‘liqni saqlash organlari faoliyati haqida jamoatchilikning xabardorligini oshirishga qaratilgan o‘zgartishlar va qo‘shimcha kiritish to‘g‘risida»gi qonun muhokama qilindi. 

Qonunga ko‘ra xalq deputatlari mahalliy Kengashlari tomonidan yarim yillik yakunlari bo‘yicha sog‘liqni saqlashni boshqarish hududiy organlari, tuman (shahar) tibbiyot birlashmalari rahbarlarining sog‘liqni saqlashni rivojlantirishga oid davlat dasturlarining bajarilishi, kasalliklar profilaktikasining holati, sog‘lom turmush tarzini va to‘g‘ri ovqatlanishni shakllantirish, shuningdek, sog‘liqni saqlashning asosiy ko‘rsatkichlari to‘g‘risidagi hisobotlarini eshitib boradilar. 

Shu bilan birga, «Fuqarolarning o‘zini o‘zi boshqarish organlari to‘g‘risida»gi qonunga fuqarolar yig‘inlari tomonidan aholi biriktirilgan tuman (shahar) ko‘p tarmoqli markaziy poliklinikalari, oilaviy poliklinikalar va oilaviy shifokor punktlari rahbarlarining sog‘liqni saqlashning holati hamda fuqarolar sog‘lig‘iga ta’sir etuvchi omillar, shu jumladan, tegishli hududning sanitariya-epidemiologik osoyishtaligi to‘g‘risidagi axborotini eshitishni nazarda tutuvchi o‘zgartish kiritiladi.