O‘zbekistonda qaysi «yashil» mahsulotlarga talab yuqori ekani ma’lum bo‘ldi
Aholi orasida organik mahsulotlarga talab boshqa mahsulotlarga nisbatan 2,2 barobar yuqori.
Makroiqtisodiy va hududiy tadqiqotlar instituti (MHTI) mutaxassislari O‘zbekistonda «yashil» biznes mahsulotlari, xizmatlari va mutaxassislarga bo‘lgan ehtiyojni o‘rganib chiqdi.
Tadqiqot davomida so‘rov o‘tkazildi va unda 720 kishi (respondent) ishtirok etdi. Ishtirok etganlarning qariyb 60 foizi mamlakatda amalga oshirilayotgan «yashil» iqtisodiyotga o‘tish strategiyasidan xabardor ekanligini bildirgan.
O‘zbekistonda «yashil» iqtisodiyot uchun qaysi sohalar muhim, degan savolga so‘rovda qatnashganlarning 18,4 foizi chiqindilarni qayta ishlash, deb javob bergan. Respondentlarning 16,9 foizi «yashil» qurilish, 8,2 foizi ekologik turizmni eng muhim sohalar sifatida qayd etgan.
Respondentlarning 17,3 foizi qayta tiklanadigan energiya manbalari, 15,4 foizi chiqindilarni qayta ishlash, 10,7 foizi shahar maydonini rejalashtirish bo‘yicha mutaxassislarga va energiya tejamkor uylarning arxitektorlariga talab bugungi kunda nisbatan yuqori ekanligini e’tirof etgan.
Qaysi «yashil» mahsulotlarga talab yuqori, degan savolga respondentlarning 16,2 foizi tabiiy oziq-ovqat mahsulotlari, 15,0 foizi «yashil» texnologiyalar, 13,7 foizi ishlab chiqarishda atrof-muhitga kamroq ta’sir ko‘rsatadigan mahsulotlar, 10,8 foizi to‘qimachilik mahsulotlari, 10,3 foizi tabiiy materialdan tayyorlangan mahsulotlarga, deya javob bergan.
So‘rov natijalari aholi orasida organik mahsulotlarga talab boshqa mahsulotlarga nisbatan 2,2 barobar yuqori ekanligini ko‘rsatdi.
Mahsulotlar, xizmatlar va mutaxassislarga bo‘lgan talabni qondirish uchun targ‘ibot ishlarini kengaytirish, qonunchilik bazasini takomillashtirish, «yashil» tovarlarni ishlab chiqaruvchilarni rag‘batlantirish, integratsiyalashgan marketing strategiyasi va aloqa rejasini ishlab chiqish va ilg‘or tajribalardan samarali foydalanish hamda boshqa zarur chora-tadbirlarni ko‘rish maqsadga muvofiq, deyiladi ma’lumotda.
Mavzuga oid
13:20 / 09.09.2024
Kichik biznesni uzluksiz qo‘llab-quvvatlash dasturi takomillashtiriladi
15:25 / 20.07.2024
O‘zbekistonda o‘z biznesini yo‘lga qo‘ygan tadbirkor xotin-qizlar soni 200 mingdan oshdi
07:30 / 29.06.2024
Toshkentda biznes hamkorlikni taklif qilib, o‘zganing 50 ming dollarini o‘zlashtirgan ayol ushlandi
11:00 / 24.05.2024