Polsha O‘zbekistonda qurilish mollari ishlab chiqaruvchi zavod quradi

O‘zbekiston elchisi Bahrom Boboyev Polshaning Luba Sohn Holding kompaniyasi rahbari Kshishtof Slabi bilan uchrashdi, deb xabar beryapti “Dunyo”.

Muloqot chog‘ida O‘zbekistonda turar joylar, binolar va sanoat inshootlarini  termal modernizatsiyalashda qo‘llanadigan ko‘pikli polistirol bloklar (penoplast) hamda butlovchi qismlar ishlab chiqaruvchi zavod qurilishiga to‘g‘ridan to‘g‘ri sarmoya kiritish masalasi muhokama qilindi.

Yangi zavod qurilishi uchun rejalashtirilgan investitsiyalar hajmi taxminan 7-10 million dollarni tashkil etadi. Zavod 300-400 nafar kishini ish bilan ta’minlash imkoniyatiga ega bo‘ladi. 

5 gektar maydonni tashkil etuvchi zavod ishlab chiqarish bo‘limlari, logistika markazi, laboratoriya, tayyor mahsulot omborlari va boshqalarni o‘z ichiga oladi.

O‘zbekiston elchixonasi tez orada investitsiya bilan bog‘liq masalalarni muhokama qilish maqsadida Luba Sohn Holding va «O‘zqurilishmateriallari» mas’ul xodimlari va mutaxassislari ishtirokida videokonferensiya tashkil etadi. Uning natijasida Polsha kompaniyasi delegatsiyasini joriy yil oktyabr oyida O‘zbekistonga yuborish to‘g‘risida qaror qabul qilinadi.