Kollej va texnikumlarga kirish test sinovlari 2 smenada o‘tkaziladi

Test sinovlarida to‘plash mumkin bo‘lgan maksimal ball – 189 ball.

Kollej va texnikumlarga kirish test sinovlari 2023 yil 26-29 sentabr kunlari 2 smenada o‘tkaziladi.

Bunda test sinovlari:

1-smenada 08:00 dan 11:00 ga qadar;
2️-smenada 15:00 dan 18:00 ga qadar bo‘lib o‘tadi.

Test sinovi kasb va mutaxassislikka mos 2 ta fan va barcha test topshiruvchilar uchun majburiy bo‘lgan 3 ta fan (ona tili, matematika, O‘zbekiston tarixi) dan o‘tkaziladi.

Unda talabgorlarga mutaxassislik fanlaridan 30 tadan, majburiy fanlardan 10 tadan jami 90 ta test topshirig‘i va ularni ishlash uchun 3 soat vaqt ajratiladi.

Test sinovlarida to‘plash mumkin bo‘lgan maksimal ball – 189 ball bo‘lib, har bir to‘g‘ri javob uchun:

1-mutaxassislik fanida — 3,1 balldan (jami 93 ball);
2-mutaxassislik fanida — 2,1 balldan (jami 63 ball);
majburiy fanlarda — 1,1 balldan (jami 33 ball) beriladi.

Ruxsatnomani my.uzbmb.uz saytidan yuklab olish mumkin. Talabgorlar test sinovi o‘tkaziladigan hududga belgilangan vaqtdan kamida 1 soat oldin shaxsini tasdiqlovchi hujjat va ruxsatnoma bilan kelishi kerak.