YeI Armaniston Haaga sudi Rim statutini ratifikatsiya qilganini olqishladi

Yevropa Ittifoqi Armaniston parlamenti tomonidan Xalqaro jinoiy sud (XJS) Rim statutining ratifikatsiya qilinishini olqishladi. Bu haqda Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrelning 4 oktyabr, chorshanba kuni e’lon qilingan bayonotida aytiladi.

«Yevropa Ittifoqi hali buni qilmagan barcha davlatlarni Rim statutiga qo‘shilishga chaqiradi, - dedi Yevropa diplomatiyasi rahbari. - Rim statutiga har bir qo‘shilish xalqaro hamjamiyatni umuminsoniy ishtirokka yaqinlashtiradi, jazosiz qolmaslik bo‘yicha umumiy qat’iylikni kuchaytiradi va mas’uliyat madaniyatini oshiradi». 

Borrelning ta’kidlashicha, XJS «xalqaro ahamiyatga molik eng og‘ir jinoyatlarni» tergov va ta’qib qilish uchun yaratilgan birinchi doimiy xalqaro suddir. 

Kreml Yerevanning Rim statutiga qo‘shilishidan norozi 

Kecha Armaniston milliy assambleyasi Haagadagi Xalqaro jinoiy sudning Rim statutini ratifikatsiya qilish uchun ovoz berdi, u 2023 yil mart oyida Rossiya prezidenti Vladimir Putinni «egallab olingan hududlardan aholi (bolalar)ni noqonuniy deportatsiya qilish» harakatida gumonlanuvchi sifatida hibsga olishga order bergan edi. Armaniston parlamenti tomonidan qabul qilingan ushbu qaror mamlakat prezidenti Vaagn Xachaturyan tomonidan imzolanganidan keyin kuchga kirishi kerak. 

Armanistonning xalqaro huquqiy masalalar bo‘yicha vakili Yegishe Kirakosyan parlamentdagi muhokamada ratifikatsiya zaruratini bu Ozarboyjon harbiylarini Armaniston hududida harbiy jinoyat sodir etgan taqdirda jinoiy javobgarlikka tortish imkonini berishi bilan izohladi. 

Kreml bunday qaror qabul qilish orqali Armaniston XJSning o‘z hududidagi yurisdiksiyasini tan olishini tanqid qildi. Rossiya prezidenti matbuot kotibi Dmitriy Peskov Kremlda Armaniston rahbariyatiga «qo‘shimcha savollar» borligini aytdi.