Isroil 7 oktyabrdagi hujumni tayyorlagan HAMAS vakili o‘ldirilganini e’lon qildi

Shodi Barud qiruvchi samolyotlarning havo hujumi oqibatida halok bo‘lgan.

Foto: Getty Images

Falastinning HAMAS tashkiloti razvedka boshqarmasi boshlig‘i o‘rinbosari Shodi Barud G‘azo sektorida o‘ldirildi. Bu haqda Isroil mudofaa armiyasi (TsAXAL) xabar berdi. Barud 7 oktyabr kuni Isroilga qilingan hujumni rejalashtirish uchun mas’ul shaxslardan biri bo‘lgani aytilmoqda.

«Isroil mudofaa kuchlari Yahyo Sinvar (HAMAS harakatining amaldagi rahbari) bilan birgalikda Isroilga qilingan hujumni rejalashtirgan HAMAS razvedka boshqarmasi boshlig‘i o‘rinbosarini o‘ldirdi», deyiladi xabarda.

TsAXAL ma’lumotlariga ko‘ra, Barud qiruvchi samolyotlarning havo hujumi oqibatida halok bo‘lgan. U o‘tmishda HAMAS batalyoni qo‘mondoni bo‘lib xizmat qilgan va isroilliklarga qarshi qator hujumlarni rejalashtirishda ishtirok etgan.

Hozircha Falastinning HAMAS harakati Barud o‘limini tasdiqlamadi.

Avvalroq, Isroil armiyasi HAMAS harakatiga aloqador harbiy-havo kuchlari bo‘linmalarining besh nafar qo‘mondoni o‘ldirilganini e’lon qilgan edi. 7 oktyabr kuni Isroilga uyushtirilgan hujumda ularning ham «muhim rol» o‘ynagani qayd etildi.

#Isroil #Hamas #TsAXAL

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.