Isroilning G‘azoga bergan zarbalari qurbonlari soni 8 mingdan oshdi

Halok bo‘lganlar orasida 3342 nafar bola va 2062 nafar ayol bor.

Foto: REUTERS/Mohammed Salem

G‘azo sektorida Isroilning zarbalari natijasida halok bo‘lganlar soni 8005 kishiga yetdi, yana 20 242 kishi jarohat oldi.

Bu haqda G‘azo Sog‘liqni saqlash vazirligi rasmiy vakili Ashraf al-Qudra ma’lum qildi.

Halok bo‘lganlar orasida 3342 nafar bola va 2062 nafar ayol bor, deya qo‘shimcha qildi rasmiy.

Unga ko‘ra, so‘nggi 24 soat ichida Falastin anklavining yana 302 nafar aholisi Isroil hujumlari qurboniga aylangan.

Isroil-Falastin mojarosi

7 oktyabr kuni ertalab HAMASning harbiy qanoti - «Izzaddin al-Qassam brigadalari» Isroilga qarshi «Al-Aqso to‘foni» operatsiyasi boshlanganini e’lon qildi. G‘azo sektoridan Isroil tomon minglab raketalar otildi, qurolli guruhlar Isroil aholi punktlariga kirdi.

HAMASning bildirishicha, operatsiya bosib olingan Sharqiy Quddusdagi Al-Aqso masjidiga bostirib kirish va isroillik muhojirlarning falastinliklarga nisbatan zo‘ravonligi kuchayib borayotganiga javoban amalga oshirilgan.

Bunga javoban Isroil armiyasi G‘azo sektorida HAMASga qarshi o‘nlab qiruvchi samolyotlardan foydalangan holda «Temir qilichlar» operatsiyasi boshlanganini e’lon qildi.

Isroil-Falastin mojarosi avj olgandan beri 8 mingdan ortiq falastinlik va 1400 nafar isroillik halok bo‘ldi.

#Isroil #G‘azo

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.