Zelenskiy UQK Tibbiyot kuchlari qo‘mondonini ishdan bo‘shatdi

Ukraina prezidenti Volodimir Zelenskiy Ukraina Qurolli kuchlari Tibbiyot kuchlari qo‘mondonini almashtirdi. Ukraina rahbarining Telegram-kanalida 19 noyabr, yakshanba kuni xabar berilganidek, Kiyevdagi «Bosh harbiy klinik gospital» klinik markazi rahbari Anatoliy Kazmirchuk Tatyana Ostashchenko egallagan lavozimga tayinlangan. 

Zelenskiy bu tayinlov Ukraina mudofaa vaziri Rustem Umerov taqdimnomasiga ko‘ra amalga oshirilganini ta’kidladi. «Menimcha, bunday qadamning sabablari Ukraina mudofaa kuchlari safida jang qilayotgan va yordam beradigan har bir kishiga ayon. Tegishli masalalar ko‘p marotaba muhokama qilingan. Askarlarimiz uchun tibbiy yordam muammolarini hal qilish vaqti keldi», — deb yozdi Umerovning o‘zi bu haqda Facebook’da.

UQK Tibbiyot kuchlari yangi qo‘mondonining vazifalari 

U o‘z postida Ukraina Qurolli kuchlari Tibbiyot kuchlarining yangi qo‘mondoni oldidagi asosiy vazifalarni sanab o‘tdi. Birinchidan, bu «jarayonlarni raqamlashtirishning maksimal darajasi va tibbiy resurslar bilan ta’minlashning barcha standartlarga muvofiqligi, shu jumladan yuqori sifatli tibbiy asbob-uskunalar bilan ta’minlash bo‘ladi». «Sifatsiz jgutlar kabi muammolarga shunchaki joy yo‘q bo‘lishi kerak», dedi Umerov. 

Ikkinchidan, gap «NATO standartlari va tegishli resurslar mavjudligiga muvofiq, jabrlanganlarga taktik yordam ko‘rsatishni o‘qitish tizimini ishlab chiqish» haqida boryapti. 

Ukraina Mudofaa vazirligi rahbari Ukraina Qurolli kuchlari Tibbiyot kuchlari qo‘mondoni oldidagi uchinchi vazifani - «tibbiy yordam ko‘rsatishning butun sikli davomida tajriba almashish uchun shaxsiy tarkib taktik va strategik darajalari o‘rtasida doimiy almashinuvni ta’minlash» deb hisoblaydi. 

O‘z navbatida, Volodimir Zelenskiy Ukraina Qurolli kuchlari Tibbiyot kuchlari boshlig‘ining almashtirilishiga izoh berar ekan, Ukraina «askarlarga tibbiy yordamning tubdan yangi darajasiga muhtojligini» ta’kidladi. «Yuqori sifatli jgutlardan tortib to to‘liq raqamlashtirish va ta’minotning shaffofligigacha, yuqori sifatli tayyorgarlikdan tortib, tibbiyot haqiqatan ham to‘g‘ri va samarali joylashtirilgan bo‘linmalarda jangovar shifokorlar bilan muloqotgacha», deb tushuntirdi Ukraina prezidenti.